2007/11/24

I love my fatherland


Сүүлийн хэд хоногт хэдэн ч галт тэрэгний буудлаар хэсчихэв, хэдэн ч өдөр явчихав, хэдэн ч буудал соличихов доо... балай авлаа шүү. Ядуу ч гэсэн Монгол орон шиг минь сайхан газар гэж алга. Хүний газар явахад түгшүүртэй шүү, салют буудахад хүртэл учиргүй сандарч, хаана юу дэлбэрээд унав аа гэж бодож энэ тэр. Дээрээс нь хулхидалт, хулгай, дээрэм гээд л.... Харийн нутагт арилжаа наймаа, ашиг орлого хайж яваа Монголчуудын маань амь нас, эрүүл мэнд хугархай зүүнээс ч үнэ цэнэгүй, баталгаагүй болсон. Ер нь Хятад гэж нэг л ёозгүй газар шүү. Амьд явахын үнэ цэнийг мэдрүүлээд л буцаадаг газар даа. Бөөн адал явдал, магад тэр нь азгүйтэл цаашилбал ужаслаг болж ирнэ.

Гэтэл Монгол маань дэндүү тайван, бүх зүйл нь энгийн, ойлгомжтой, зон олон нь сайхан сэтгэлтэй, охид бүсгүйчүүд нь өнгө гоо, үзэсгэлэн төгөлдөр гээд л хорогдох зүйл эх оронд минь асар их шүү. Everything has its beauty but not everyone sees it гэдэг шиг...

Маргааш Монгол Улс тунхагласны баяр болно. Энэ баярыг би лав хувьдаа хэрхэн яаж тэмдэглэхээ сайн мэддэггүй юм. Ямартай ч маргааш өглөө төрийн дууллаа тогтож нэг сайхан сонсох юм шүү.

Улс тунхагласны баяраар бүгдээрээ гэртээ сайхан гурил, ногоогоор хачирласан махаа чанаад гэр бүл, найз нөхдөөрөө хамт ширээний ард Төрийн дууллаа эгшиглүүлэх зуураа Үндсэн Хуулийнхаа эхний өгүүлбэрийг уншчихаад хоолловол Улс тунхагласны баярын ач холбогдолыг илүү өндөржүүлэх юм шиг ээ... 😊 

За ингээд бүгдэд нь Улс тунхагласны баярын мэнд хүргэе!

Жич: Төрийн дуулал

МОНГОЛ УЛСЫН ҮНДСЭН ХУУЛЬ

Монголын ард түмэн бид:

- Улсынхаа тусгаар тогтнол, бүрэн эрхт байдлыг бататган бэхжүүлж,
- Хүний эрх, эрх чөлөө, шударга ёс, үндэснийхээ эв нэгдлийг эрхэмлэн дээдэлж,
- Төрт ёс, түүх, соёлынхоо уламжлалыг нандигнан өвлөж,
- Хүн төрөлхтний соёл иргэншлийн ололтыг хүндэтгэн үзэж,
- Эх орондоо хүмүүнлэг, иргэний ардчилсан нийгэм цогцлуулан хөгжүүлэхийг эрхэм зорилго болгоно.

Үүний учир Монгол Улсын Үндсэн хуулийг даяар олноо зарлан тунхаглаж байна

PS: Надаа лав хүмүүнлэг, иргэний ардчилсан нийгмийг цогцлуулан хөгжүүлнэ гэсэн хэсэг нь асар таалагдаад байдаг юм. Хүмүүнлэг, иргэний нийгэм гоё шүү гсн... Эх орноо хачин их саналаа ш дээ. 😊


2007/11/21

Амьдрал...

1 кг хадаас, 3 хайрцаг плита, уран зураг, хуушуур, хөгжим, гарчигласан сонин, уншаагүй номнууд, уулзаагүй хүмүүс, онгоцны буудал, 3 тонн цемент, утасны хонх, оройн хоол, анир чимээгүй, маргааш нөгөөдөр, хаалга цонх, хийх зүйлсийн жагсаалт, төлбөр тооцоо, баасан гариг, цоорхой яндан, айраг, онгорхой цонх, уранхай өмд, өдөн хөнжил...

сүүлийн өдрүүдэд амьдрал нэг иймэрхүү...



2007/11/09

Шинэ ертєнц

Шинээр мэндэлсэн мэт сул дорой бие.
Борооны дараах хотын гудамж мэт бодол санаа.
Гүн шарталтын дараа ертөнц улам өнгөлөг болох ажээ.

Согтууруулах ундаанаас шинэ мэдрэмж хайх нь солиоролд хүргэж болохыг дээрхи өгүүлбэрүүд харуулна.

Гадны, хүч давамгайлсан өдөөгчгүйгээр шинэ мэдрэмжийг эрэлхийлэх нь амьдралыг улам баялаг болгож өгөх мэт санагдана.


2007/11/07

Нэгдэж байгаадаа баяртай байна

Сайн байцгаана уу? Энэ сайт руу орох би маш дуртай байдаг. Бусад сайтуудад хүмүүс тоглоом тохуу хийсэн, хий хоосон бичлэг урсгасан байдаг бол харин энэ сайт утга учиртай санагддаг. Нэг л өөр. Хэн нэгний ертөнцөөр зочилж байгаа мэт, сайхан сэтгэгдэл төрдөг. Мөн илүү олон хүн үзэл бодлоо хуваалцах боломжтой болсонд таатай байна. Тиймээс та бүхэнтэй нэгдэхээр шийдлээ. Би Монголдоо байдаг, Төрийн бус байгууллагад ажилладаг сэтгүүлч бүсгүй. Гэхдээ удахгүй Европ руу гарахаар зэхэж байгаа л даа. Аль орон? Яаж? Ямар ажил олдох бол? Эрсдэл ямар байх бол гэхчлэн олон асуулт байнга толгойнд эргэлдэж байна. Тиймээс надад тусламж, зөвлөгөө өгнө гэдэгт найдаж байна.


2007/11/05

Welcome to Theory blog

Яаая, Theory блогт бусад хүмүүс бичлэг нэмж болдог боллоо. Ура :), гоё шүү! By the away, За тэгээд:

1. Theory блогт бичлэг нэмэхийн тулд эхлээд та Yahoo messenger-тэй орно уу! Тэгээд энэ зурган дээр дарж, гарч ирэх цонхонд блогт холбогдох мэйл хаягаа бичээд send хийнэ үү! Хэсэг хугацааны дараа Theory блогоос таньд мэйл очих бөгөөд дотор нь байгаа link дээр дарж идэвхижүүлсэнээр нэвтрэх цонхонд очих болно.

2. Мөн таны энэ мэйл хаяг Google account эрхтэй байх ёстой. Тиймээс Greate your account now гэсэн дээр нь дараад Google-д бүртгүүлчихээрээ. Google үргэлж таньд хэрэг болдог шиг, Google account-тай байхад хэзээ нэгэн цагт хэрэг болно. Ингээд л гүйцээ. Одоо Theory блог руу орж SIGN IN хийгээд блогт бичлэг нэмж болно. Харамсалтай нь одоогоор Theory blog-ийн database, register хоёрын мэдээллийг нэгтгэж чадахгүй байгаагаас давхар бүртгүүлэх болоод байна, sorry. MySql-ийн учирыг олохын бол нэгтгэхийг бодноо.

3. Блогт бичлэг нэмэхдээ дараах зүйлсийг анхаарна уу! Бичихдээ заавал крилл фонт хэрэглэвэл их сайн байна, тэгвэл уншихад хамаагүй амар байх. Theory блогийн default encoding нь unicode тул Windows XP-ийн languages дотроос Монгол хэлийг сонгоод шууд бичиж болно, unicode мандтугай! гэсэн. Хэрэв тийм боломж байхгүй бол энд байгаа латин-крилл хөрвүүлэгчийг хэрэглэж болно (тус кодыг бичсэн Бадралд баярлалаа). Латинаар бичигдсэн зүйлс блог дээр тавигдахгүй шүү. Блогт бичлэг нэмэхийн тулд +New Post гэж бичлэгээ хийгээд Publish Post дарахад л болно. Бас нэг зүйл: Courier фонтоор бичихыг бодоорой, мөн бичлэгийн агуулгадаа тааруулаад Labels for this post хэсэгт тохирох сэдвээс аль нэгийг нь сонгож бичиж өгөөрэй. Зохион байгуулалтын хувьд илүү замбараатай болох байх.

PS: За guys бичээрэй, идэвхитэй байна шүү нөхдөө. Хүчирхийлэлтэй хувилбар болон хэтэрхий offensive, эсвэл огт бодрол агуулаагүй бичлэгийг тооцохгүй шүү!:)